𝐋𝐢𝐜𝐞𝐧𝐬𝐮𝐫𝐞 𝐄𝐱𝐚𝐦 𝐏𝐚𝐬𝐬𝐞𝐫𝐬 𝐦𝐮𝐥𝐚 𝐬𝐚 𝐏𝐚𝐦𝐚𝐧𝐭𝐚𝐬𝐚𝐧 𝐧𝐠 𝐋𝐮𝐧𝐠𝐬𝐨𝐝 𝐧𝐠 𝐏𝐚𝐬𝐢𝐠, 𝐊𝐢𝐧𝐢𝐥𝐚𝐥𝐚 𝐬𝐚 𝐢𝐬𝐚𝐧𝐠 𝐑𝐞𝐜𝐨𝐠𝐧𝐢𝐭𝐢𝐨𝐧 𝐂𝐞𝐫𝐞𝐦𝐨𝐧𝐲 

Kinilala ang Licensure Examination Passers ng Pamantasan ng Lungsod ng Pasig (PLP) sa isang recognition ceremony na pinamagatang 𝙏𝙚𝙨𝙩𝙞𝙢𝙤𝙣𝙞𝙖𝙡 𝘾𝙚𝙧𝙚𝙢𝙤𝙣𝙮 𝙛𝙤𝙧 𝙋𝙇𝙋 𝘽𝙤𝙖𝙧𝙙 𝙋𝙖𝙨𝙨𝙚𝙧𝙨 ngayong araw, January 14, 2026  na ginanap sa Auditorium ng PLP.

Umabot sa halos 250 board passers na kumuha ng Licensure Examination for Professional Teachers, Philippine Nurse Licensure Examination, Certified Public Accountant Licensure Examination, at Electronics Engineers and Electronics Technicians Licensure Examination ang binigyang pagkilala sa nasabing seremonya.

Bilang parte ng programa, nagbigay ng testimonial messages sina Micheriel Campo, CPA; Threxy Lyca Anne Isuga, LPT; Darius Baraga, ECT, ECE; at Brianne Jane Nacionales, RN na nagsilbing kinatawan ng board passers mula sa iba't-ibang licensure examinations. Nakatanggap ng sertipiko ang board passers bilang parte ng Testimonal Ceremony. 

Dinaluhan ito nina Mayor Vico Sotto, Congressman Roman Romulo, Vice Mayor Dodot Jaworski, at 12th Sangguniang Panlungsod Committee on Education Chairperson Councilor Simon Tantoco na nagpaabot ng pagbati sa board passers at magulang ng mga ito, kasama sina Councilor Ryan Enriquez at SK Federation President Keil Custillas. 

Naging sentro sa mensahe ng mga opisyal ang pagiging proud ng mga ito sa board passers at hiling sa mga ito na 𝙢𝙖𝙣𝙖𝙩𝙞𝙡𝙞𝙣𝙜 𝙢𝙜𝙖 𝙢𝙖𝙢𝙖𝙢𝙖𝙮𝙖𝙣 𝙣𝙖 𝙢𝙖𝙮 𝙞𝙣𝙩𝙚𝙜𝙧𝙞𝙙𝙖𝙙 𝙖𝙩 𝙥𝙖𝙩𝙪𝙡𝙤𝙮 𝙣𝙖 𝙥𝙖𝙜𝙩𝙖𝙩𝙖𝙜𝙪𝙮𝙤𝙙 𝙣𝙜 𝙚𝙭𝙘𝙚𝙡𝙡𝙚𝙣𝙘𝙚 𝙤 𝙠𝙖𝙝𝙪𝙨𝙖𝙮𝙖𝙣.

Nagpasalamat si Mayor Vico Sotto sa board passers sa pagsisilbing inspirasyon ng mga ito para sa mga opisyal ng Pamahalaang Lungsod. Ibinahagi niya na kapag nakakakita ng mga kwento ng tagumpay katulad ng sa board passers, ay nakakaengganyo at mas ginaganahan ang opisyal at kawani na galingan pa sa trabaho. Aniya, sulit ang investment ng lokal na pamahalaan, ng Inang Pamantasan, at ng taxpayers ng Lungsod ng Pasig sa buhay ng board passers. 

Ang mensahe naman ni Vice Mayor Dodot Jaworski sa board passers: "Don't stop here. You can even go higher." bilang pagtukoy para magpursige ang mga ito na magkaroon ng post-graduate degrees. Pinaalala din ng Bise Alkalde sa mga ito na huwag kalimutan ang Inang Pamantasan at maalala na magbalik sa bayan o sa lungsod, sa pamamagitan ng pagiging mabuting Pilipino.

Samantala, ibinahagi naman ni Congressman Roman Romulo na lubos niyang nauunawaan ang pressure na naranasan ng board passers kaya aniya, pinatunayan ng mga ito na karapatdapat ang mga ito na maging mga propesyunal, at na ito ay ipinagkaloob, hindi ng PLP, hindi ng Lungsod ng Pasig, kundi ng Republika ng Pilipinas.

Nagbigay naman ng update si 12th Sangguniang Panlungsod Committee on Education Chairperson tungkol sa panukalang ordinansa para makapagbigay ng incentives para sa top notchers, na tinalakay sa kauna-unahang Committee on Education Hearing para sa taong 2026. Bagamat mayroon na itong resolusyon, itataguyod na maipasa ito bilang ordinansa para maisulong ang institusyonalisasyon nito. Sa kanyang pagtatapos, pinaalalahanan niya ang board passers na "Kahit saan dalhin ng buhay, ng mundo, dalhin [ng mga ito] ang talento nang may dangal."

I-check ang post ni Mayor Vico Sotto kaugnay ang testimonial ceremony sa link na ito para sa iba pang detalye: https://www.facebook.com/share/p/18324zpZWY/ 

Congratulations sa board passers at sa mga pamilya ng mga ito! Congratulations din sa ating Inang Pamantasan!

#UmaagosAngPagasa